Lo primièr ministre francés, Jean-Marc Ayrault, a anonciat que son govèrn refusarà una manifestacion convocada dissabte que ven contra lo vidèo estatsunidenc que fa una parodia de Maomet e qu’a causat de violentas protèstas. Dins una entrevista a RTL, Ayrault a anonciat que s’enebirà perque es instigada per de “grops minoritaris que vòlon esplechar” la situacion actuala. Dissabte passat, de grops integristas musulmans manifestèron près de l’ambaissada dels Estats Units a París; la protèsta s’acabèt amb mai d’un centenat d’arrestats.
 
 
De caricaturas de Maomet
 
Parallèlament, lo primièr ministre francés a fach una crida a la responsabilitat après la publicacion ièr, dins lo setmanièr satiric Charlie Hebdo, de caricaturas de Maomet qu’illustran l’actualitat de las protèstas contra lo filme considerat coma blasfemaire. En concret, la revista consagra la primièra pagina del darrièr numèro, aparegut ièr, a las manifestacions que se desvolopan dins lo mond musulman contra un filme estatsunidenc que fa una parodia sus la figura sagrada de Maomet. E Charlie Hebdo o fa, justament, amb de nòvas caricaturas del profèta, e mai en sabent que de lo representar graficament, aquò es enebit per l’islam.
 
En novembre passat, la redaccion del setmanièr foguèt destrusida amb de coctèls Molotov, coïncidissent amb la publicacion d’un numèro especial qu’arborava una caricatura de Maomet. Per aquò, uèi, lo ministre de l’Interior francés, Manuel Valls, a refortit la seguretat a l’exterior de la sedença de la revista a París.
 
Lo director de la publicacion, Stéphane Charbonnier, “Charb”, reconeis que las nòvas caricaturas poirián generar de polemica, mas ne justifica la publicacion en disent que “se començam de nos demandar s’avèm lo drech de dessenhar Maomet o pas, s’es perilhós d’o far o pas, la question seguenta serà: «podèm representar de musulmans dins lo jornal?», e après encara, «podèm representar d’èssers umans dins lo jornal?», etcetèra, e fin finala i representarem pas res, e lo grop d’extremistas que s’agitan dins lo Mond e en França aurà ganhat”.
 
Charb viu jos proteccion policièra dempuèi l’incendi de la redaccion de la revista, arunan.
 
En 2006, la meteissa revista foguèt denonciada per afronts religioses après reprodusir las polemicas vinhetas de Maomet que las aviá publicadas lo jornal danés Jyllands-Posten. Lo jutge decretèt l’absolucion de Charlie Hebdo en 2007.
 
Charlie Hebdo se faguèt remarcar mai d’un còp per sas posicions jacobinas, ostilas e insultantas contra las minoritats lingüisticas de l’estat francés, tant a travèrs d’articles coma a travèrs de dessenhs. Aquò se passèt especialament en 1998 quand i aguèt dins l’estat francés un debat public tocant la ratificacion (mancada) per França de la Carta Europèa de las lengas Regionalas e Minoritàrias.
 
 
Mai de seguretat per las ambaissadas
 
E mai se defend la libertat d’expression, Ayrault a apelat a la “responsabilitat” en se referissent a Charlie Hebdo. De mai, a demandat que s’adòpte de mesuras de seguretat davant de possiblas represalhas contra las siás ambaissadas.
 
Del sieu costat, lo ministre dels Afars Estrangièrs, Laurent Fabius, a anonciat aquelas mesuras a France24 dins l’encastre d’una conferéncia de premsa tocant lo Tractat sus l’Estabilitat Europèa.“Evidentament, ai enviadas d’instruccions dins totes los païses ont aquò pòt portar de problèmas, per que se prenga de precaucions de seguretat particularas”, çò declarèt lo ministre. “Cal que los ambaissadors s’adapten, compte tengut de la realitat locala. Esperam que i aurà pas d’incidents mas a l’encòp prenèm las nòstras precaucions”, çò indiquèt egalament lo ministre, en convidant a la prudéncia.
 
 
Deman se barrarà las escòlas francesas e las ambaissadas dins vint païses
 
Lo ministre a anonciat tanben que las escòlas francesas a l’estrange, amb las ambaissadas, seràn barradas deman divendres, dins un vintenat de païses.